Tamacahut n Ṭṭehriruc

Ṭṭehriruc

 

Ṭṭehriruc s tjewwaqt-is

 

Amacahu, ad yelhu, ad yeḍbeɛ am usaru ad yuɣal annect n ujga.

 

Zik-nni deg yiwet n taddart n tmurt n Leqbayel tella yiwet n twacult ɣur-s aṭas n yizamaren d wuli.Taqeḍɛit merra i t-ikessen d yiwen n umeksa maca yiwet n tzimert d amaẓuẓ n twacult i wimi qqaren Ṭṭehriruc i tt-yettawin ad tkes deg wayla-nsen.

Yiwen n wass am leɛwayed, yessufeɣ-d Ṭṭehriruc tizimert-is seg uddaynin akken ad tt-yawi ad tkes deg uqwir-nsen anda yella rrbiɛ yerra tili.

Tizimert segmi tessekna aqerruy-is ɣer tmurt d nettat tkes, tettett deg yal lxir i d-yemɣin n teḥcicin deg wakal-nni, ula d tikkelt ur d-tessuli aqerruy-is. Ṭṭehriruc ula d netta yedha deg turarin, ulac tin ur yurar, maca skudmal ittɛedday wakud taɛebbḍt-is tettneẓif seg laẓ yerna iqreḥ-it usemmiḍ, teḍra-yid-s am uɣerda n lǧamaɛ: yelluẓ yerna ulac sdat-s d acu ara yečč. Ilaq ad yuɣal s axxam akken ad yefḍer, ma yeqqim akken aɛebbuḍ-is d ilem ad yeḍru yid-s wayen n diri yerna mačči d win iṣebbren.

Yenna i tzimert-i: « Kker a tizimert ad nuɣal s axxam, aɛebbuḍ-iw d ilem, yelluẓ yerna iqreḥ-iyi usemmiḍ.

Tizimert terra iman-is am tin ur nesli, nettat učči-ines deg lexla i yella mačči deg uxxam ma d asemmiḍ ur d-yekki ara akk fell-as imi taɛrurt-is tdel-itt taduṭ.

-Ala, nekk ur ttuɣal-ara s axxam tura, ad qqimeɣ da i as-terra.

-Wiyya-m a tizimert, zwir sdat-i s axxam!

-La k-qqareɣ ala ala!

-Kker wiyya-m neɣ ad ɛeddiɣ ad as-ssiwleɣ i wuuccen ad d-yas ad kem-yečč!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer wuccen yenna-as:

-Ay uccen, yya-d ad teččeḍ tizimert, tizimzert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Uccen ur d-yecɣil yid-s yedha d cceɣl-is.

-Yyaɣ wiyy-ak ay uccen! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i uydi ad d-yerki fell-ak!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer uydi yenna-as:

-Ay aydi, yyaɣ ad terkiḍ ɣef wuccen, uccen yugi ad yečč tizimert,tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Aydi ur d-yecɣil yid-s yedha d cceɣl-is.

-Yyaɣ wiyy-ak ay aydi! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i uɛekkaz ad ak-yewwet!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer uɛekkaz yenna-as:

         -Ay aɛekkaz, yyaɣ ad tewteḍ aydi, aydi yugi ad yerki ɣef wuccen, uccen yugi ad yečč tizimert; tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Aɛekkaz ur d-yecɣil yid-s yedha d cceɣl-is.

-Yyaɣ wiyy-ak ay aɛekkaz! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i tmes ad ak-tesṛeɣ!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer tmes yenna-as:

-A times, yyaɣ ad tserɣeḍ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Times ur d-tecɣil yid-s tedha d cceɣl-is.

-Yyaɣ wiyy-am ay times! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i waman ad kem-ssensen!

–Nniɣ-ak ala, ala, ala!

Ṭṭehriruc irekkem seg zɛaf yerza ɣer Waman yenna-asen:

 

Aman ugin ad sensen times

-Ay aman, yyaw ad tessensem times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Aman ur d-cɣilen yid-s, dhan d ccɣel-nsen.

-Yyaw wiyy-awen ay aman! I sen-yenna Ṭṭehriruc.

-Neqqar-ak, ala, ur nettas-n ara!

-yyaw, i sen-yerna Ṭṭehriruc neɣ ad as-ssiwleɣ i uzger ad aken-isew!

-Nenna-ak, ala, ala, ala!

Ṭṭehriruc irekkem seg zɛaf yerza ɣer uzger yenna-as:

-Ay azger, yyaɣ ad tesweḍ aman, aman ugin ad ssensen times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Azger ur d-yecɣil yid-s yedha d cceɣl-is.

–Yyaɣ wiyy-ak ay azger! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i tefrut ad ak-tezlu!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer tefrut yenna-as:

         -A tafrut, yyaɣ ad tezluḍ azger, azger yugi ad isew aman, aman ugin ad ssensen times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Tafrut ur d-tecɣil yid-s tedha d cceɣl-is.

-Yyaɣ wiyy-am ay tafrut! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i umzil (aḥeddad) ad kem-issefsi!

–Nniɣ-ak ala, ala, ala!

Ṭṭehriruc irekkem seg zɛaf yerza ɣer umzil yenna-as:

-Ay amzil, yyaɣ ad tessfsiḍ tafrut, tafrut tugi ad tezlu azger, azger yugi ad isew aman, aman ugin ad ssensen times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

 

Ageccul n umzil deg tḥanut-is

Amzil ur d-yecɣil yid-s yedha d cceɣl-is.

–Yyaɣ wiyy-ak ay amzil! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i uɣerda ad yeflu ageccul-ik!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer uɣerda yenna-as:

-Ay aɣerda, yyaɣ ad tefluḍ ageccul n umzil, amzil yugi issefsi tafrut, tafrut tugi ad tezlu azger, azger yugi ad isew aman, aman ugin ad ssensen times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

Aɣerda ur d-yecɣil yid-s yedha d cceɣl-is.

-Yyaɣ wiyy-ak ay aɣerda! I s-yenna Ṭṭehriruc.

-Nniɣ-ak ala, ur n-ttaseɣ ara!

-Yyaɣ, i s-yerna Ṭṭehriruc neɣ ad as-ssiwleɣ i umcic ad ak-yečč!

-Nniɣ-ak ala, ala, ala!

Ṭṭehriruc irekkem seg zɛaf yerza ɣer umcic yenna-as:

-Ay amaci, yyaɣ ad teččeḍ aɣerda, aɣerda yugi ad yeflu ageccul n umzil, amzil yugi issefsi tafrut, tafrut tugi ad tezlu azger, azger yugi ad isew aman, aman ugin ad ssensen times, times tugi ad tesreɣ aɛekkaz, aɛekkaz yugi ad iwwet aydi, aydi yugi ad yerki ɣef wuccen, uccen yugi ad yečč tizimert, tizimert tugi ad nuɣal s axxam, nekk iqreḥ-iyi usemmiḍ yerna lluẓeɣ.

 

Nekk ad ččeɣ aɣerda i yenna umcic

Yekker umcic yerra-as-d:

-Nekk, ad ččeɣ aɣerda!

-Ihi, ula d nekk ad fluɣ ageccul n umzil! I yenna uɣerda.

-Ihi, ula d nekk ad ssefsiɣ tafrut! I yenna umzil.

-Ihi, ula d nekk ad zluɣ azger! I tenna tefrut.

-Ihi, ula d nekk ad sweɣ aman! I yenna uzger.

-Ihi, ula d nekkni ad nessnes times! Ay nnan waman.

-Ihi, ula d nekk ad serɣeɣ aɛekkaz! I tenna tmes.

-Ihi, ula d nekk ad wwteɣ aydi! I yenna uɛekkaz.

-Ihi, ula d nekk ad rkiɣ ɣef wuccen! I yenna uydi.

-Ihi, ula d nekk ad ččeɣ tizimert! I yenna wuccen.

-Ihi, ula d nekk ad kecmeɣ s axxam! I tenna tzimert.

Ṭṭehriruc d tzimert-is uɣalen s axxam, nettat terra s addaynin ma d netta yerra ɣer yemma-s ad as-d-theggi imekli ara yečč ɣef yiri n lkanun.

 

Tamacahut lwad lwad mliɣ-tt-id i warraw n lejwad.