Tazɣent n ungal « Ccḍeb akked yiẓuran ».
Ungal-iw amezwaru
Aṭas n wazulen i kečč a Mass Malek Houd.
atan tanezzayt n wass-a i suliɣ s tɣuri ungal-nni: Ccḍeb d Yiẓuran, ur ukiɣ ara amek i t-suliɣ, acku taqsiṭ tedda akken ddan waman, ungal-agi yettawi amdan ikeččem deg waṭas n temsal, timsal i gellan si tama d takatut, d ccfawa n wayen meṛṛa yezrin, deg-s yella usenfufed nn tmes, times n Teqbaylit izehren deg ulawen.
ungal-agi d dellu ɣef ugerruj deg wayen yerzan amawal n Teqbaylit, agerruj am wagi yessefk ad d-yeqqim, Dɣa s tira yecban tagi atan simal awalen-nni d areṣṣi i gettṛeṣṣin, amdan ad yeqqaṛ ad yeqqaṛ deg iman-is : amek i nefka afus deg wannect-agi meṛṛa, amek i nerra di rrif timusniwin am ti, amek nezzi s waɛrur i wayen i d-ǧǧan imezwura?
Cwi tella Nna Mennun akked Ccabḥa, nutenti beddent, werǧin srisent tagecrirt, xas ulamma di lḥif llant, xas ulamma laẓ yemjaji i tuddar, d acu kan imezdaɣ deg ulawen ṛwan, D tawant yellan deg ulawen-nsen i gellan i At Wass-a d aɛwin.
Akli ma nezmer ad nini d isem-is i d awal-is seg wasmi i d-yekker asgunfu ur t-yessin ara, yezga fell-as uzaglu, xdem rnu, krez, fres, leqqem, crew, lqweḍ, ṛebbi lmal, xas akken yugi ad yali wass fell-as tegguma ad d-tban tafat, wissen acuɣeṛ, wissen ar melmi?
amzun drus n twaɣyin, amzun ur ten-teṛwi s tyita, dɣa timseqqeft tegla ula s mmi-s Yidir, Yidir i gellan d asirem n tudert, amzun akken tuǧǧla tegguma ad ttexḍu i twacult-nni. amzun d tagi kan i d tunett n Weqbayli di ddunit?
Ula d Ṭawes xas ulamma fsin fell-as icuddan n tirubḍa, d acu kan win tessarem tḥucc-it tmettant, neɣ ini ḥuccen-t wid yugin ad d-tḍil tafat ɣef Weqbayli.
Imdanen-agi xas ulamma di teqsiṭ ay llan maca ɣaḍen-iyi, acku deg-sen ttwaliɣ tamurt-nneɣ, agdud-nneɣ, tameslayt-nneɣ, idles-nneɣ, leɛtab-nneɣ, ttwaliɣ meṛṛa tuddar-nneɣ yettwasebblen iwakken ass-a ad ilin warraw-nsent d aḍaṛ aneggaru. amzun akken leɛtab akked tidiwin ṛuḥen di rrayeɛ.
Iɣaḍ-iyi Yidir iṛuḥen akken d isegmi aleqqaq d win tegguni tefsut, d win yeǧǧuǧgen di tmusni iwakken asirem ad yili.
Di taggara sarameɣ iwakken ungal-agi ad yili d izen, izen ad yawweḍ ɣer yal yiwen ɣer tal yiwet, iwakken asirem ad yidir ur yettmettat, iwakken Taqbaylit ad d-ndekwal deg ulawen akked Yilsawen, iwakken Yidir ur yettneqlab ara deg uẓekka-s ad ttili tasa-s tellez, xas yunag d ilemẓi, Meɛna inig n Teqbaylit akked Weqbali ad ikemmel tikli-s di tudert.
tinemmirin a Mass Malek Houd
nek yid-ek di Tẓerrajt ma nemlal atan lqahwa sɣuṛ-i.
Ameziane Ait Belkacem
Ayen yura Malek Houd.
Aghucaf's Blog 