Kamal qqaren-as Mourad
Kamal Qqaren-as Mourad
Inebgi ara n-yasen
Ɣur-wen a yemma d baba
D win i d-trebbam, d mmi-twen
Yeǧǧan tawacult-is n da
Teɣreq merra deg leḥzen
Leḥzen-nni ur nettfakka
Mazal mraw n wussan
Settin-nni ad ten-yeqfel
I testaɣt-ines d lawan
Acḥal fell-as i yuzzel
Ad as-sgunfun yiɣsan…
Tarwiḥt, iḥweṣ-itt lajel
Ula d idɣaɣen la ttrun
Idɣaɣen swayes ibennu
Tiɣerɣert teqqim d amdun
Axxam deg lebni-s la yettraju
Win akken i t-ibennun
D ayen yejba ur d-yettnulfu
Acḥal d win i d-iwujhen
Ɣer gma teǧǧa tudert
Ameǧǧed d yimeṭṭawen
Uɣen-d izerban n taddart
Dubbzen, jerḥen wulawen
Mi neǧǧa-n Mura deg tmeqbert
Amin terra-t tmara
Tura d netta i d ixef
Ɣer Rebbi dayen tefra
Ddunit yeḥṣa ad t-tessengef
I tebɣest ad yernu kra
Akken lḥif ad as-yanef
Xemsa i d-teǧǧa tɛebbuḍt
Yiwen n uḍad deg ufus yenqes
Ay afus lxir teɛnuḍ-t
Aneɣni akken ad yekkes
Tagmat mačči d taɛluḍt
Ɣef win ixuṣṣen ad tebges
Malek Houd. Tazmalt ass n 12/06/2024
Aḍris n twajeht n Mourad