Imukar n tegrawla
Rebban tacriḥt deg tlisa
Yiwen n ukarṭuc ur yeffiɣ
Ulac ul, ulac tasa
D watmaten i gan iniɣ
Ttaɣen kan awal i Fransa
Yeččan tiɣrit seg Umaziɣ
Ar tura tga d ameksa
Tḍufer kan yiwen n uzenziɣ
Rray-is deg-neɣ i yensa
Tenna : « Lliɣ, mazal ad iliɣ »
D aḥmal i ḥemmlen tamurt
Fkan iman-nen d asfel
Mmuten deg leɛmer n tefsut
Ttɣaḍen msakit Leqbayel
Tagrawla teɛreq-as tewwurt
Uwin-tt wid yezdeɣ ddɣel
Tilelli texreb-as temzurt
Asirem n ugdud yenɣel
Iɣelli-d rrsas d tefrut
Tudert tazeddgant tegdel
Seḥlulin-tt-id deg Sinima
Tmendawt tterkaḍen mi bɣan
Tlata tikal yettgalla
D Aɛraben akk i aɣ-rran
Ɣef tmurt ɣeḍlen-d lmizirya
Ilemẓi ččan-t yiselman.
Leḥkem ɣef uɣref yejjujra
Yekkes-as akk izerfan
Yak sqedlalan ar tura
Ssuqqsen ugaren izerman
Ass-a terza-d tdukli
Seg zik yuki Uqbayli
D aqerruy n Yimaziɣen
Adabu yugi ad yeɣli
Yesmerkay gar watmaten
Anay, gullen ur yuli
Aẓar bɣan ad t-gezmen
Ma d aɛrab bɣan-t ad yili
Isem n Umaziɣ ad t-neṭlen.
Bgayet ass n 22/07/2019