Muḥ

 

Muḥ

 

Udem yenḥafen

Yettarra-tt ala i teḍsa

Amzun kra ur iḍri

Ul-is ar daxel yewwa

S lemḥani meskin yedri

Tezzi-yas acḥal d tarwa

Yettraju lqaɛa ad teldi

D amekraz n lḥif

 

 

 

 

 

 

 

Ala iɣallen-is i yesɛa

D axeddam seg wasmi i d-ikker

Ass-agi ad t-naf d ameksa

Azekka ad t-naf imegger

Ɣef wudem-is tidi d takka

Fkant-as sser n wezger

 

Wid yesɛan kerrzen fell-as

Walan lḥif ikbel-it

S tuzert n wudem ttwenniɛen-as

Ttaččaren-as imi s tiẓẓit

Deg yiḍ ɛeggu irennu-yas

Yerwa terẓeg n ddunit

Yeɛya muḥ

 

Tameṭṭut-is am netta

Tekkat agelzim n lḥif

Arraw-is rwan leɛra

Tagrest trennu-d aɣilif

Yessusem ur d-yenni kra

D argaz yessagren nnif

Terwa lḥif

Ittaḍsa ɣef zzman amcum

Ireggem s yiqenṭaren

F lǧerra-s mmɣen-d lehmum

Cudden-as allen-is ɣef yidrimen

Awi-d kan ad yaf aɣrum

I warraw-is ad ččen

Tezzi-as acḥal d tarwa

 

Weḥd-s yeqqim yettraju

Melmi ara as-d-teldi tewwurt

Tarwa tettimɣur trennu

D nettat ad d-yawin tafsut

Netta amzu yettargu

Tura kan mi t-tdel tagut .

 

Tazmalt, ass n 04.12.1983.