Menyif lmaâun-a wala ldjedra n useklu
Ttif win i nessen wala…
Tajmaɛt ass-nni teččur am tmellalt. Asrugmet d leɛyaḍ, ad send-tesleḍ anda i telliḍ. D acu yeḍran akka ? D izgaren i yennejmaɛen d agraw. Ɣef wacu akka i ttemceqlalen segmi d-yuli wass ar tura, alaḥal ad yezgen wass, iṭij ad yeṭṭef talemmast n yigenni.
-Amer yettuɣal lxir talfi yuɣal i nekkni s yizgaren i d-yenna yiwen seg-sen.
-Segmi ara d-nekker d takerza, laɛtab yezga d amwanes, yettagi ad yeṭixxer fell-aneɣ, ma d asmi ara aɣ-tfakk tezmert ad d-ɣlin fell-aneɣ yijenwiyen ur nettḥezzib. Aksum, ad t-aɣen d tarbaɛt, ad t-ččen, ma d aglim, ad t-lsen d icifaḍ, i d-yerna wayeḍ.
-Wellah ar nettuɣaḍ, neɛteb nezzeh, azaglu acḥal d aẓayan ires ɣef umgerḍ uḍbir nekkni ad nernu asiker n lemmaɛen s tgersa yentan deg wakal yeqquren. Wa d lbaṭel, ilaq ad nerfed yiwen wawal ɣef tikkelt swayes ara nesṭixxer wa i aɣ-d-ittenǧaren akka lemmaɛen. Dayen, tiyita tewweḍ ɣer yiɣes, neɛya mačči d kra, ilaq ur tettɣimi ara kanakka fell-aneɣ, ilaq ad tt-tbeddel.
-Ih! Ih! Ilaq ad t-nesṭixxer! Akka i d-neṭqen ɣef tikkelt yizgaren tezdeɣ tnekra.
Yiwen n uzger yeqqimen deg teɣmert n tejmaɛt, yemmed ɣef wiyiḍ, ar tura ur d-igir yiwen n wawal. Mi kkren fell-asen akk ad rzun ɣer win akken i d-ixeddmen lemmaɛen i wakken ad as-inin: « dayen teṭaxxreḍ ! » amɣar-nni n yizgaren yerfed awal i tikkelt tamezwarut :
« D acu i ken-yuɣen akka ? Rret-d ɣur-wen leɛqel i tesruḥum s yiffasen-nwen, xemmemet kan cwiṭ, kunwi tekkrem-d am tmes-nni n teẓgi, tesreɣ aqquran tegla s uzegzaw. Xzut cciṭan i ken-izedɣen ɣef tikkelt, tuɣalem-d ad tɛiwdem leḥsab i taluft, akken qqaren : « Deg ugraw, mi ara ilin ḍelmen akk, lmaɛna-s ma nnan nesɛa lḥeqq, sɛan akk lḥeqq ».
-Ihi, tgezmem-tt ad tawḍem ɣer win i aɣ-d-ittenǧaren lemmaɛen i nezzuɣur seg wasmi akken i tebda ddunit, ad as-tinim: « Dayen, neɛya deg-k, nebɣa wayeḍ ».
-Tbegsem-d merra ad as-tinim ad k-nbeddel s wayeḍ. Ẓriɣ, teẓram akk mi ara yezɛef yiwen, yesserwat berra i unnar. Ayen ara s-yelhun, ur t-ittwali, yezga yedderɣel fell-as, maca ayen ara s-d-yeglu s lmaḍerra yettarra-as-t Rebbi d ayen kan. Ihi, ma ad iyi-taɣem awal, i nekk i d-ilulen mačči iḍelli, slet-iyi-d d acu ara wen-d-iniɣ: « D tidet, lemmaɛen njebbed mi ara nkerrez ẓẓay, jerbeɣ-t acḥal d aseggas, nekk d umeddakel-iw i d-yeggran ass-a d icifaḍ, maca ḥṣut bellik amdan-a i aɣ-d-ittenǧaren allal-a n tkerza, nessen-it akk, neẓra amek i iga lemmaɛen ara ɣ-d-iheggi akka d tasawent, wanag win ara d-yasen d amaynut, ad yeṭṭef amḍiq-is, ur t-nessin ara, lemmaɛen ara ɣ-d-yeqqen ad t-nzuɣer, ahat d lǧedra n useklu s lekmal-is mebla ma inǧer-itt-id ».
